Котало яккхар

Сентябрь бетта 11-ча дийнахьа, Лас-Вегасе (США) дунен котолон юкъе дакъа лоацаш хинна вай мехкахо Кхоартой Микаила Калой дото майдальг яккхарца «Вольная борьба» оалача к1алтохарга лата коттваьннав.

Туркий мехка сий доаккхаш, ший коталонца цун ц1и кхы а дунен д1ахозийташ, Селим Яшар аьнна ц1и а йолаш, латаш хилар Калой. Ала деза, цу коталоно 2016-ча шера Рио Де Жанейро хургдолча олимпийский ловзарашка дакъа лаца аьттув беннаб цун. Латархо Калой отташ вар 86 кийла кхаччалца дег1а дозал долча латархошца. Финале кхаьчача, вай Россе паччахьалкхера волча Садулаев Абдулрашида хьалхара моттиг д1аеларца ийшар из.

25 шу мара даьнна деце а, дикка гаьна ваьнна, к1алтохаргах долча латарца чам болча наха дукхавезавенна а цох наьха дог лзаш а ва буг1а-Калой. Итт шу совг1а ха я из к1алтохаргах латаш а, из говзал караерзае г1ерташ а къахьегаш вола. Карарча хана цу латарах ше хьалха ваьнна а д1ахо доккхаг1долча латарашкахьа дакъа лаца аьттув болаш а, раьза волаш, ше воккхийвеш ва Калой. «Цкъар се олимпийский ловзарашка дакъа лаца г1оргволаш хьалхаваьнна воккхий ву аз, цул совг1а геттара раьза ва со, сайна латар хьехаш волча сай трейнера айса вас ца яь. Д1ахо йодача хана а, Дала низ лой хьалха дувлаш хургда вай», — йоах Лас-Вегасе хиннача латарашка дото майдальг яьккхача Кхоартой Калойс.

Калойна латар хьалха доаккхаш цунца къахьегаш вола тренер 2000-ча шера Сидней хиннача Олимпийский ловзарашка Туркий мехка сий доаккхаш дото майдальг яьккхарца котало яьккха вай мехкахо Б1архой Асхьаба Адам ва. Белгалде доаг1а, Адама 2008-ча шера дунент1ара эггара дикаг1вола тренер аьнна, ц1и еннальга. Х1аьта укх хьехархочо б1архой Адама яхачох Кхоартой Калой д1ахойодача хана хьалхара моттигаш йоахаш чакхвала аьттув ба. «Нагахьа санна, тахан мо къа а хьегаш д1ахо йодача хана а Даьла г1онца латара кийчлуш тхо д1адолхе, Калой боккха аьттув ба олимпийский пьедестале отта. Из хургхиларах дог тийша а да тхо», — йоах Б1архой Адама.

Х1аьта сона ала лов, д1ахо мел хургдолча латарашка хьалхара моттиг йоаккхаш Калой котвоалалва.

Дала аьттув боаккхалба цун!

Мате-наькъан Илез

serdalo.ru

Добавить комментарий

Ваш e-mail не будет опубликован. Обязательные поля помечены *