Г1алг1ай метта в1ашаг1кхетар «Метта говзал»

Къаман г1улакх-оамал дег1адоаладара йолча «Эздел» яхача юкъарлос, г1алг1ай мотт шаьрбе а 1омабе а дагахьа, «Метта говзал» аьнна, ц1и а йолаш, г1алг1ай меттацара болх д1аболабаьб. Из хургба бетта цкъа е шозза, нах в1ашаг1 а тохаш.

Дахача к1ирарча п1аьраска дийнахьа хилар хьалхара в1ашаг1кхетар. Нах т1а а хьийха ловзара хьисапе д1абихьар из болх.

Цига баьхкабар дукхаг1ча даькъе кагирхой; хоамбоаржабархой, хьехархой, цхьацца паччахьалкхен декхараш кхоачашдераш, иштта кхы д1ахо г1алг1ай меттаца шоашта чам бараш а. «Метта говзал» д1ахьочарна хьалхашка латта декхар да г1алг1ай мотт хар а, бовзар а, из ц1енаг1а бувцар а наха юкъе д1а-хьа доаржадар. Цул совг1а лерх1, меттаца цхьана къаман г1улакх-оамал а, 1адаташ а, вахара хьал а деррига цхьан г1алг1ай меттала дувца а, дагбувла а, дашха а, из дег1адоаладе а.

Хьалхар хинна в1ашаг1кхетар, тхьовра ма хьохадара, ловзара хьисапе дар. Из хургда кхаь даькъа дийкъа: ловрарцеи, хьаьша вехарцеи, йоазон-уйлай балхашцеи дувзаденна. Цу г1улакха хьалхабаьнначар яхачох, цу тайпара из болх д1ахьой, г1алг1ай мотт дикка шаьрлургба.

Че яьча баьхкача наьха аьттув боалар мотт бувца а, цхьацца дицдаь дешаш шоаш бувцача меттагахьа юкъе кхувла а. В1ашаг1кхетар чакхдалалцца г1алг1ай мотт мара бувцаргбоацаш д1ачоаг1даь, нагахьа санна кхыча меттал сага дош оале цунна г1од а тохаш, г1алг1ай меттала цхьаъ е ах оаг1о йоазо а дешийташ д1абихьар болх. Из г1улакх, шин-кхаь сага мара г1од ца тохаш, д1адийрзар.

Че д1ахьош хиннача Матенаькъан Илеза белгалдир карарча хана г1алг1ай мотт малаг1ча хьале ба а, вай къаман мотт 1омабаргахьа къахьега дезаш хилар а, безам хуле, из хала доацилга а. Д1ахо диц а даь къаьнара да яхаш юстара а даьха леладеш дола дешаш юха вай метта юкъе а даьха, вай мотт хийцца бувца безаш хилар а дийцар Илеза. Цул совг1а, че д1ахьош наха ца довза тарлу дукха керда дешаш юкъе даьхадар, г1алг1ай меттала а эрсий меттала а царна ма1ан деш. Уж дар укх тайпара:

Г1аьрахо (в) – разбойник

Жоп (д) – ответ

К1оде –поощрять

Лоадам (б) – важность, значение

Маьлхара – грустный, печальный

Маьрша саг (в) – мирный житель

Ноахал (д)– поколение

Охцал (я) – сварливость, грубость

Поал (б) – гадание

Поалхам (б) – опыт

Та1азар (д) – наказание

Теба – подкрадываться

Турпал (в) – герой

Уйлане – задумчивый

Хаттар (д) – вопрос

Ховшк (в) – всезнайка

Ц1имхара – жесткий, суровый,

Ч1оаг1алд (д) – проект.

Тахан массаварг а оарцаг1аваьнна, вай сомал ца йой, мотт кегабелар кхерам ба. Фу де деза из кегалургбоацаш, д1абаргбоацаш? Ма хулла ц1аг1а а, балха а, ара а – массанахьа хьаккхашта бувца беза из.

Дала аьннадале, т1ехь т1айоаг1а че йолча хана хьалха санна хоам бергба нахага. Ховш хургда маца, мичахьа ва веза. «Метта говзал» яхача г1алг1ай метта в1ашаг1кхетаре хьава йиш йолаш ва моллаг1а а меттаца ший чам бар, замигавар аьнна е воккхавар аьнна башхало яц.

Дала бахийталба вай г1алг1ай мотт!

Добавить комментарий

Ваш e-mail не будет опубликован. Обязательные поля помечены *