«Эздел» юкъарле дIадихьар «Метта говзал» яхача гIалгIай метта клуба аргIанара вIашагIкхетар

Июнь бетта 28-ча дийнахьа «Эздел» яхача, гIулакх-оамал сийрдадаккхара йолча юкъарлос дIадихьар «Метта говзал» яхача гIалгIай метта клуба чудоагIаш дола аргIанара вIашагIкхетар.

Из дар июнь бетта 27-ча дийнахьа хIара шера дIахьош долча Россе къоначар денна хетадаь. Из дош дашха укхаза гулбеннабар боккхийнахи кагий нахи. ЛаьрххIа къоначар хаттарашка ла а дувгIаргдолаш, хьалха дIаяхача ханашкахьа вай кагий нах, йоI, зIамига саг мишта хиннаб, карарча хана мишта, малагIча оамала тIехьа хила беза цар дувцаргдолаш, укхаза бийха бар ГIалгIайчен халкъа йоазонхо Коазой Аюпа Iисаи, ГIалгIайчен йоазонхой цхьогIон доакъашхо Матенаькъан Iумара Iабаси.

ВIашагIкхийттачар дийцар гIалгIай кагийнах, кIант, йоI хьалха шой хана мишта бар, малагIча гIулакхашта тIехьабар уж, мел лоархIам болаш дар цар гонахьарча наха юкъера гIулакх. «Дукхача хIаман мах бар тайпан, цIен кхийна эздий кIант, йоI хьаоттар, къаьстта дезале кIаьнк вар сийдолаш дар къаман. Цу ханарча кагийча наха шоайла тIехбаьнна цабоагIа бегаш бицар вIалла а. ХIаравар шийгара гIалат далар кхераш, шийна улувра нах лорабеш хулар. ХIанз хийла зIамига саг, йоагIаш е йодаш йоI бIаргаейча, ше машенаца вале, сигнал а техе вода. Из мегаргдолаш дац, ше лай хилар да цу тайпарча зIамигача сага хьахьокхар. Дахача а дахкача а лоралуш, вай кхалнах лора а беш хила деза вай», — йоах Коазой Iисас.

— ХIара саг укх дунен чу ший моттиг хьалаца вена ва. Воккхачун, зIамигачун, маIачун, кхалчун ше-ший оамал я хила езаш. Вай къаман из массаза а долаш хиннад. Тахан а из, кхы кега ца долийташ, дIадахьа деза вай хIаране. Воай кагий нах лорабе беза, 20 шера е 30 шера хала дас, нанас хьалкхебаь дезал бовргбоацаш, цар шоаша цхьаннача харцахьча чукховсаргбоацаш, лорабе беза вай уж. ХIана аьлча вай кхоане я из. ЦIена кхетам болаш, Iилма ховш йола тIехье хьалкхер моллагIча а къама доккха совгIат да. ХIаьта из совгIат вай къама хилийта деза вай. — йоах Матенаькъан Iабаса.

ХIаьта вай къоначарна ловца боаккхаш оаха ях. Дала даькъала болба вай кагий нах. Дала цIена, тешаме тIехьа хьакхейойла вай къаман.

 

Добавить комментарий

Ваш e-mail не будет опубликован. Обязательные поля помечены *